తలసేమియా (జన్యు పరమైన జబ్బు):Thalassemia

తేది:January 23, 2007 వర్గం:సేవ రచన:చరసాల 4,979 views

దీని గురించి విన్నా గానీ ఎప్పుడూ సీరియస్‌గా ఆలోచించలేదు. MAD( To Make a Difference)లో సభ్యున్నయ్యాక ప్రశాంతి మొదలైనవారు దీన్ని పదేపదే ప్రస్తావిస్తూ వుంటే, ఇదేదో సీరియస్ జబ్బు అనుకున్నా. దీని గురించి అవగాహన ముందు నేను కల్పించుకోవాలని గూగుల్ చేస్తే చాలా విషయాలు తెలిశాయి.
తలసేమియా అనేది అనువంశకంగా వచ్చే రక్త వ్యాధి. ఇది అంటుకోవడం ద్వారానో, ఎంగిలి అవడం ద్వారానో, సంభోగం ద్వారానో సంక్రమించదు.
ఇక వివరాల్లోకి వెళితే దేహంలోని వివిధ భాగాలకి సక్రమంగా ప్రాణ వాయువు అందాలంటే రక్తంలో హెమోగ్లోబిన్ అనే ప్రోటీన్ అవసరం. ఈ హెమోగ్లోబిన్ ప్రోటీను ఊపిరితిత్తుల నుండీ ప్రాణవాయువును గ్రహించి, రక్తంలో ప్రవహించి కాలేయము మొదలగు భాగాలకు కావాల్సిన ప్రాణవాయువును అందిస్తుంది. హెమోగ్లోబిన్ ప్రోటీన్ మళ్ళీ ఆల్ఫా, బీటా అనే రెండు రకాల ప్రోటీన్ భాగాలతో నిర్మితమవుతుంది. అయితే ఈ ఆల్ఫా, బీటా ప్రోటీను భాగాల వుత్పత్తికి కావాల్సిన ప్రోగ్రాం (script) జన్యువుల్లో వుంటుంది. ఒక్కో క్రోమోజోముకి ఒక జత ఆల్ఫా జన్యువులు, ఒక బీటా జన్యువు వుంటాయి. అండ ఫలదీకరణ సమయంలో ఒక క్రోమోజోము తల్లి నుంచీ, ఇంకొకటి తండ్రి నుంచీ వస్తాయి. అంటే ప్రతి ఒక్కరికీ రెండు ఆల్ఫా జన్యువులు, ఒక బీటా జన్యువు తల్లి నుంచీ, రెండు ఆల్ఫా జన్యువులు, ఒక బీటా జన్యువు తండ్రి నుంచీ సంక్రమిస్తాయి. అంటే ప్రతి ఒక్కరిలో నాలుగు ఆల్ఫా జన్యువులు, రెండు బీటా జన్యువులు వుంటాయి. ఆల్ఫా జన్యువులు ఆల్ఫా ప్రోటీను వృద్దికి కారణమైతే, బీటా జన్యువులు బీటా ప్రోటీను వుత్పత్తికి కారణమౌతాయి.
రెండు జతల ఆల్ఫా జన్యువులు, ఒక జత బీటా జన్యువులు అయినప్పటికి ఇవి సరి సమాన మొత్తాలలోనే ఆల్ఫా, బీటా ప్రోటీను విడిభాగాలను తయారు చేస్తాయి.
ఈ జన్యువుల ఆరోగ్యం బాగున్నంత వరకూ ఫరవాలేదు. అయితే మార్పు చెందడమే సృష్టి ధర్మం కనుక ఒకానొక పరివర్తనలో (mutation) ఈ జన్యువులు అనారోగ్యం పాలయి ప్రోటీను వుత్పత్తిని తగ్గించడమో, నిలిపివేయడమో చేస్తాయి. అప్పుడు ప్రాణవాయువును సరఫరా చేయాల్సిన హెమోగ్లోబిన్ వుత్పత్తి సరిగ్గా జరగక ప్రాణానికే ప్రమాదం వస్తుంది.
తలసేమియా రెండు రకాలు. ఆల్ఫా తలసేమియా మరియు బీటా తలసేమియా.
ఆల్ఫా తలసేమియా: ఆల్ఫా జన్యువులు సక్రమంగా పనిచేయక ఆల్ఫా ప్రోటీను వుత్పత్తి జరగక పోతే ఆల్ఫా తలసేమియా అంటారు.
బీటా తలసేమియా: బీటా జన్యువులు సక్రమంగా పనిచేయక బీటా ప్రోటీనుల వుత్పత్తి జరగక పోతే బీటా తలసేమియా అంటారు.
కనీసం రెండు ఆల్ఫా జన్యువులు, ఒక బీటా జన్యువు వున్నా జీవితాన్ని నెట్టుకు రావచ్చు. ప్రాణానికి వచ్చిన అత్యవసర ప్రమాదమేదీ లేదు. పైగా ఆధునిక పద్దతుల్లో పరీక్ష చేస్తే తప్ప ఒకనిలో జన్యులోపముందని కనిపెట్టలేం. అయితే వచ్చే చిక్కల్లా అలాంటి వ్యక్తికి పుట్టే బిడ్డలతోనే!
వుదాహరణకు తండ్రి రెండు ఆల్ఫా జన్యువులు లేని/పనిచేయని క్రోమోజోము, తల్లి రెండు ఆల్ఫా జన్యువులు లేని/పనిచేయని క్రోమోజోము కలిశాయి అనుకోండి. అప్పుడు వాళ్ళకు పుట్టిన బిడ్డకు వుండాల్సిన నాలుగు ఆల్ఫా జన్యువులు మిస్సవుతాయి. అలాంటి బిడ్డ పుట్టిన వెంటనే మరణించడమో, బతికినా జీవితాంతమూ రక్తమార్పిడి చేయాల్సి రావడమో జరుగుతుంది. అంటే ఈ వుదాహరణలో తండ్రికీ, తల్లికీ ఏ బాధా లేకపోయినా వారిద్దరూ బిడ్డలకు తలసేమియా రావడానికి వాహకులు/కారకులు అయ్యారు.

Thalassemia
అలాగే సరిగ్గా పని చేయని బీటా జన్యువు వున్న రెండు క్రోమోజోములు కలిస్తే బీటా తలసేమియాతో బిడ్డ పుడతాడు.
(కడుపులోనే పిండము ఎందుకు చనిపోదు అంటే పిండము గాలి పీల్చదు గనుక ఊపిరితిత్తుల నుండి ఆక్సిజను తీసుకెళ్ళాల్సిన అవసరము లేదు. తల్లి ప్రేవు నుండి ఆక్సిజను సరఫరా చేయడానికి గామా జన్యువు గామా ప్రోటీను వుత్పత్తి చేస్తుంది.)
దీని ప్రకారము మనము తెలుసుకోవలిసింది ఏమిటి అంటే పెళ్ళికి ముందే, లేదా కనీసం పిల్లల కనటానికి ముందే తలసేమియా వాహకాలుగా వున్నామేమొ పరీక్ష చేయించు కోవాలి. ఒకవేళ వున్నట్లయితే కనీసం మన భాగస్వామి వాహకుడు/వాహకురాలు కాకుండా వుండేలా జాగ్రత్త పడాలి.
ంఆడ్ ఈ విషయమై అవిరళ కృషి చేస్తూ వుంది. ప్రజల్లో దీనిపై అవగాహన కల్పించడానికి క్యాంపులు, సెమినార్‌లు నిర్వహిస్తూ వుంది.
మీరు కూడా దీనిని నిర్లక్షము చేయకండి. పిల్లలు కనే యోచన వున్నట్లయితే రక్త కణాల శాతము మరీ తక్కువగా వుందేమొ చూడండి. అందుకు అచేతనంగా వున్న తలసేమియా కారణమేమొ పరీక్షించుకోండి.
దీనికి చికిత్స మరియు మరిన్ని వివరాలు కావాలంటే డాక్టర్ ఇస్మాయిల్ గారి బ్లాగు సందర్శించాల్సిందే!
–ప్రసాద్

విజయవంతంగా స్పేస్ కాప్సూల్ రికవరీ

తేది:January 22, 2007 వర్గం:వర్తమానం రచన:చరసాల 1,458 views

వావ్! అమితానందంగా వుంది నాకు. మనకిదో పెద్ద మలి అడుగు!
–ప్రసాద్

అంతరిక్ష యుద్దాలు

తేది:January 19, 2007 వర్గం:వర్తమానం రచన:చరసాల 1,371 views

కోల్డ్‌వార్ శకం ముగిసిందని సంబరపడుతున్న రోజులు ఎంతో కాలం వుండవేమొ! ఒక బాలిస్టిక్ క్షిపిణితో అంతరిక్షం లోని ఉపగ్రహాన్ని చైనా నాశనం చేసిందట! ఇది సహజంగానే అమెరికాను గగ్గోలు పెట్టించింది. ఈ వృత్తాంతమంతా చూస్తుంటే చిన్నపిల్లలు చదివే “స్నో వైట్” కథ గుర్తుకు వస్తుంది. అందులో “స్నో వైట్”గా పిలువబడే రాకుమార్తె సవితి తల్లి దగ్గర ఒక అద్దం వుంటుంది. అందులో అందరిలోకి అందగత్తె ఎవరన్నది తెలుస్తుంది. స్నో వైట్ తనకంటే అందగత్తెగా మారిందని తెలియగానే ఆమెను మట్టుబెట్టడానికి లేనిపోని మాయోపాయాలు ప్రయోగిస్తుంది సవితి తల్లి.
ఇప్పుడు అమెరికా పాట్లు అలాగే వున్నాయి. తనే ప్రపంచంలోకి బలవంతుడుగా ఎల్లకాలం వుండాలి, ఇంకొకడు ఎదుగుతున్నాడని తెలియగానే దాన్ని అంతం చేయడానికి అన్ని పన్నాగాలు పన్నుతుంది. అయితే ఒక నియంత ఏలుబడిలోని రాజ్యం ఇలాంటి ఎత్తులు వేస్తుందంటే దాన్ని అర్థం చేసుకోవచ్చు కానీ అతి పురాతనమైన  ఒక ప్రజాస్వామ్య రాజ్యం అలా చేస్తుందంటే నమ్మలేకపోయినా నమ్మాల్సిన నిజం!
గత ఏడాదే వండి వార్చిన తన రోదసీ విధానంలో “రోదసీలో తన హక్కులను, సంపత్తిని, తనకు నచ్చిన విధంగా ఉపయోగించుకునే తీరును” నిలబెట్టుకుంటూనే, “తన హక్కులకు భంగం కలిగే విధంగా గానీ, తనకు భవిష్యత్తులో పోటీగా ఎదురయ్యే విధానాలను నిరోధించే హక్కు” కూడా తనకే దఖలు పడిందని తనకు తనే రాసుకుంది.
ఇప్పటికే అమెరికా తన ఉపగ్రహాలని గూడచర్యానికి, లక్ష్యాలను గుర్తించడానికి, లక్ష్యంమీద దాడిని నిర్దేశించడానికి వాడుకుంటోంది. అలాంటపుడు ఇతరులకు అలాంటి ఉపగ్రహాలని నాశనం చేసే హక్కు ఎందుకు వుండగూడదనుకుంటుందో అర్థం కాదు. నా శత్రువు ఒక ఉపకరణాన్ని నా మీద దాడికి వుపయోగిస్తున్నపుడు నాకు దాన్ని నాశనం చేసే హక్కు తప్పకుండా వుండాలి. ఇప్పుడు చైనా సమకూర్చుకుంటున్న శక్తి అదే! దానికి మనం తప్పుబట్టాల్సిన పని లేదు. ఆ మాటకొస్తే ఉపగ్రహాలను రక్షణావసరాలకు వాడుతున్న అమెరికానే అలాంటి అవసరాన్ని చైనాకు కలిగించిందని చెప్పాలి.
అయితే చైనా అవసరం ఎలాంటిదైనా, అందులో దాని తప్పొప్పులు ఎలా వున్నా ప్రజాబాహుళ్య శ్రేయస్సు దృష్ట్యా చూస్తే ఇది తప్పు. ఇప్పటికే చాలినన్ని కక్ష్యలు లేక, వున్న కక్ష్యల్లో చాలినంత స్థలం లేక అల్లాడుతుంటే వున్న క్షేమకరమైన స్థలాన్ని ఇలా పేల్చి వేసిన చెత్తాచెదారాలతో నింపేస్తే భవిష్యత్తులో శుక్రుడి చుట్టూ దుమ్ము వలయాలున్నట్లు భూమి చుట్టు కూడా ఏర్పడిపోతాయి. రోదసీలో తిరుగాడే అతి చిన్న దూళి రేణువు కూడా రోదసీ శకటాలకు, ఇతర వుపగ్రహాలకు హాని చేస్తాయి. పైగా ఒకడు చేశాడని ఇంకొకడు పోటీపడి ఇలాంటి పరీక్షలు నిర్వహిస్తే రోదసీ ప్రపంచపు భవిష్యత్తు శకలాల మయమై పోతుంది.
–ప్రసాద్

నా పూర్వపు రాతలు

తేది:January 18, 2007 వర్గం:కవితలు రచన:చరసాల 2,317 views

ఇవి నా కాలేజీ జీవితానంతరంలో రాసుకొన్న పిచ్చి రాతలు. జారిపోతాయేమొనని ఇక్కడ భద్రపరుస్తున్నా!
********
ఎండిపోయిన
ఎడారిలో
తొలకరి జల్లు కురిపించు
జవ్వని ఎవ్వరో…

***

నీ
పై పెదవి ఇంద్రధనుస్సుకున్న
క్రింది పెదవి నారిని
నా నాలిక భాణంతో
మీటేదెన్నడు నారీ…

***

నీ అద్బుతపాదాలనంటుకొని రాలిపోయిన దుమ్ము కూడా ప్రకాశవంతమే.
నీ వెలుగు చిమ్మే కళ్ళల్లోకి నే చూడలేక వంగి నిలుచుంటాను.
కానీ… విచిత్రంగా నీ పాదాలు నన్ను పలుకరిస్తాయి, నన్ను నిలువరిస్తాయి…
చివరికి స్వప్నంలో కూడా నన్ను చూడవస్తాయి.

***

నీ
చక్కని చల్లని
చేతి స్పర్ష
కమ్మగా నైనా
కఠినంగానైనా
కలలో నైనా
నా చెంపను తాకితే..
ఊహకు అందని ఆ అనుభూతిని
ఏమని వర్ణించను..

***

ఊపిరి తీయకుండా
ఆగగలను క్షణమైనా
ఆగలేను నీ తలపులు లేక

***

నాలోని హృదయం నాదా నీదా
అని సందేహమొచ్చింది
ఎందుకంటే..
అది నాకంటే నీగురించే ఎక్కువ ఆలోచిస్తోందే..

***

నా హృదయాన్ని
దారానికి గుచ్చి
వెతుకుతున్నాను,
నిన్ను అలంకరిద్దామని..
ఎంతకూ కనిపించవేం?

***

సాయంత్రవేళ సముద్రఘోష
పౌర్ణమినాటి పండువెన్నెల
నది ఒడ్డున ఇసుకతిన్నె
నిన్నె గుర్తుకు తెస్తున్నాయి
నీ చెలి ఎప్పుడొస్తుందని
నన్ను అడుగుతున్నాయి

***

సామ్రాజ్యాధిపత్యమా
నీ చెలి సాంగత్యమా
అంటే
నా చెలి సాంగత్యమే
నాకు మక్కువంటాను!

***

ఒంటరివాడనని
వెక్కిరించే
ఓ పిల్ల తిమ్మెరా?
నా ఊపిరినిండా
వూహలనిండా
నా చెలేనన్న సంగతి
తెలియదా?

***

రక్త మాంసాదులతో
ఏర్పడిన దేహం నీదంటే
నేనొప్పుకోను
నీ రక్తంలో అమృతాన్ని
నీ కళ్ళల్లో వెన్నెల గుళికనీ
నింపి వుంటాడు
ఆ బ్రహ్మ!

***

ఓ నెచ్చలీ
నీ వెచ్చని ఆలోచనలతో
నిద్రే రాకున్నది
నీ వెచ్చని కౌగిలిలోనూ
నిద్రరాదు…ఊసులు తప్ప.

***

నేను పుట్టిన వెంటనే
నువ్వు కావాలని ఏడ్చాను
నిన్ను పలకరించాలని మాటలు నేర్చాను
నీకు వ్రాయటానికై వ్రాత నేర్చాను
సూర్యున్ని దివిటీగా
పట్టుకొని
ప్రతిరోజూ నిన్నె వెతుకుతున్నా
పాతిక వసంతాలు
గడిచినా
నీ జాడ లేదు.

***

గల గల పారే సెలయేరు
కిలకిలా రావాల కోయిల
పచ్చని పైరుపంటలు
అన్నీ సింగారించుకొని వచ్చాయి..
సఖీ! ఇక నీదే ఆలస్యం.

***

నా సుఖమూ,
సంతోషమూ,
సఫలత్వమూ,
అన్నింటిలోనూ అసంపూర్ణతే
నీవు లేక, నా జీవితమూ
నేనూ కూడా అసంపూర్ణమే.

***

నేను మూగవానిగా
చెవిటివానిగా
గుడ్డివానిగా అయినా
జీవించగలను…
కానీ
నీ ప్రేమరహితంగా జీవించలేను.

***

ప్రియా!
నీకు తెలిసినా
తెలియకున్నా
నాకు తెలుసు…
నీవు పీల్చి వదిలిన గాలినే
నేనూ పీలుస్తున్నాను గనుక
బ్రతికి వున్నానని.

***

దేవుడు ప్రత్యక్షమై
మూడు వరాలు
కోరుకొమ్మంటే
ప్రేమ
ప్రేమ
ప్రేమ
కావాలంటాను.

***

తల్లి వాత్సల్యాన్ని,
చెల్లి అనురాగాన్ని,
అక్క ఆప్యాయతనీ,
రంభ సౌఖ్యాన్నీ..
ఈ ప్రపంచంలోని
సమస్త సుఖాలనీ ఒక్క
నీనుండే జుర్రుకోగలను ప్రియా!

***

నీకోసం మళ్ళీ మళ్ళీ
మానవునిగానే కాదు
పేడా పురుగుగానైనా
జనిమించగలను,
నాకు తోడుగా నీవు నిలిస్తే.

***

ప్రియా,
నీవూ, నేనూ వేరంటారు
మూర్ఖులు.
కాదు, ఒకే ఆత్మ రెండు ముక్కలుగా
నీలో నాలో వుండబట్టి,
ఒకే దేహం నీ, నా గా విడిపోబట్టి కదా..
నీ,నా ఆత్మలు, దేహాలూ
ఒక్కటవడానికి సదా ఇంత
ఆరాటపడుతున్నాయి.

***

ఓ చెలీ!
నీ వాక్కులే నాకు వేద వాక్కులు
నీ దర్షనమే దైవ దర్షనం
నీ చుంబనమే అమృత సేవనం
నీ సాంగత్యమే స్వర్గ సుఖం
నీ సేవయే నాకు దైవ సేవ!

***

ఏ ఒడిలోనూ
బడిలోనూ
గుడిలోనూ
పొందలేని సౌఖ్యాన్ని
ఇవ్వగల నీకు
ఏ దేవత సాటి రాగలదు?

***

ఓ సఖీ!
నా దేహంలో ప్రాణం నీవు
నా వాక్కులో భావం నీవు
నా పాటకు పల్లవి నీవు
నా జీవిత పరమార్థం నీవు!

***

ప్రేమ తంత్రుల వీణ
నా మనసు
దానిపై రాగాలు పలికించు
కొనగోరు నీవు!

***

ఒక్క క్షణమైనా
నీ సాహచర్యం
నాకు లభిస్తుందంటే
ఈ కంటకప్రాయమైన
మానవ జన్మలను
ఎన్నైనా ఎత్తుతాను!

***

నీ కళ్ళు కురిపించు
ప్రేమధారలలో
మునిగి వుక్కిరిబిక్కిరి
అవుతున్నాను
ప్రియా!
నన్ను అక్కున చేర్చుకొని
రక్షించవా!

***

నీ చూపుల గాలం
నా హృదయాన్ని
గాయం చేస్తోంది
తీసుకో నా హృదయాన్ని
నీ వలపుల బుట్టలో వేసుకో!

***

ప్రియా!
నీవు లేక అష్టైశ్వర్యాలూ
త్యజిస్తాను
నీ సన్నిధిలో చావునైనా
చిరునవ్వుతో ఆహ్వానిస్తాను.

***

నీ వూహలతో
బరువెక్కిన కాలం
కదలడం లేదు
నిన్ను పొందాలన్న
బలమైన కాంక్ష
నన్ను ఊపిరి సలపనివ్వడం లేదు.

***

నిన్ను చూడటానికి కళ్ళు
నిన్ను చేరడానికి కాళ్ళు
నిన్ను వేడుకోవడానికి నోరు
వున్నా
ఏమీ చేయజాలని
నా నిస్సహాయ జీవితం కంటే
రోజూ నీ అందమైన
పాదాలనంటి పెట్టుకొని
తిరుగుతున్న
నీ పాదరక్షల జీవితం
ఎంత గొప్పదో కదా!

***

నీ ముంగురులతో ఆడుకొనే దువ్వెన
నీ వంటిపై నర్తించే సబ్బుబుళ్ళ
నీ పాదాలనంటిపెట్టుకొని వుండే
పాదరక్షల కన్నా
పవిత్ర వస్తువులు
ఈలోకంలో మరేం వున్నాయి?

***

బస్సు గురించో, దారి గురించో
ఆట గురించో, పాట గురించో
పువ్వు గురించో, నవ్వు గురించో
ఆలోచిస్తావు గానీ
నా గురించి ఒక్క సెకనులో
వేయ్యోవంతు ఆలోచించినా
చాలదా ఈ జన్మ సార్థకం అవడానికి?

***

నల్లని మబ్బుల మాటున
దాగిన జాబిల్లీ
వెన్నెల కురిపించు నీ కన్నులు
నీ వునికిని నా కెరుక
పరుస్తున్నాయిలే!

***

ఏ గుడిలోనూ కనిపించని
ఏ దేవతవు నీవు?
ఏమని మొక్కిన
కటాక్షించదవు?

***

ఈ రోజు బస్టాపులో
నిన్ను చూశాను
నీవు విసిరిన వలపు చూపులో
చిక్కుకొని నేను విలపిస్తుండగా
బస్సెల్లిపోయింది
అందులో నీవూ వెళ్ళిపోయావు
నేను మాత్రం బస్టాపులో మిగిలిపోయాను.

***

నా హృదయ మైదానాన్ని
చదును చేసి వుంచుకొన్నాను
నా మనసు కోయిల
వసంతరాగాన్ని ఆలపిస్తూనే వుంది
ప్రేమ పన్నీటి జల్లు
కురిపిస్తూనే వుంది
అయినా…
ఆ మొక్క పూయదేమిటి?
ఈ గులాబీ విరబూయదేమిటి?

***

ప్రేమ ఫలము యొక్క
మధుర రసము గ్రోలాలని ఆస!
కానీ…
ఇంకా చెట్టే కనిపించదే,
ఫలమెప్పుడు దొరికేను?

***

నీ ముద్దొచ్చే పెదవులనీ, బుగ్గలనీ
సూరీడు తన కిరణ బాహువులతో
ఎంత తన్మయంగా తడుముతున్నాడో చూడు!
గాలి తనేమీ తక్కువ తినలేదని
నీ ముంగురులు సవరించి,
చున్నీ లాగుతూ పరాచికాలాడుతోంది!

***

ప్రియా!
వుదయమే నీవు చూసిన ఆచూపు
నన్ను రోజంతా చైతన్యంగా
వుంచిందే…
ఇక నాతో కలిసి నీవు నడిస్తే
ఇంకో పది జన్మల భారాన్నైనా
అవలీలగా మోయలేనా!

***

పల్లవి లేని పాటను నేను
రాగం లేని గీతం నేను
కొమ్మలు లేని మోడును నేణు
వసంతం లేని కాలం నేను
చంద్రిక లేని గగనం నేను
నూవు లేని నేను నేను.

***

ఆనందమున్న చోట దఃఖము
ప్రేమ వున్న చోట ద్వేషమూ
పుడతాయట!
అందుకే నిన్ను ప్రేమించాలన్నా
భయంగా వుంది!

***

ఓ అందమా!
నీ చెంప ఆ చెవిపోగుకు
అందాన్ని తెచ్చింది
నీ పాదం ఆ కాలి అందెకు
మెరుగునిచ్చింది
నిన్ను మోస్తున్నందుకు
బస్సు చూడు
ఎంత విజయగర్వంతో
పరుగెడుతోందో!

***

ప్రియా!
నాకు మోహం లేదు
కామం లేదు
కోరిక అసలే లేదు…
నీ మోము లోకి చూస్తూ
కాలం గడపాలన్న
కాంక్ష తప్ప!

***

రోజూ ఎదో వ్రాస్తున్నాను
నీ మీది ప్రేమను
ఇంతకంటే ఎక్కువగా
తెలియజేయలేకున్నాననే బాధ
నన్ను పీడిస్తోంది.
ఎలా వ్రాసినా అవి నన్ను
వెక్కిరిస్తూ చూస్తున్నాయి.

***

ఈరోజు ఒక విషయం
నన్ను ఏద్చేలా చేసింది
నీకేదో కస్టం కలిగినట్లుగా
నేణు తల్లడిల్లి పోయాను
నీతో చెబితే
నన్ను పిచ్చివాడిగా
చూస్తావేమొ!

***

ఓ నిర్దాక్షణ్య కాలమా!
ఎన్నాళ్ళిలా ప్రేమ ఱంపముతో కోసి
నా హృదయాన్ని గాయపరుస్తావు?
ఎన్నాళ్ళీలా ఒంటరి గానాన్ని
ఆలపించమంటావు?
ఇక నా వల్ల గాదు.

***

నీ సందర్యాన్ని నా రెండు కళ్ళతో
అంచనా వేయాలని చూస్తూ
ఈ ప్రేమగానాన్ని నా నోటొతో
పాడటానికి ప్రయత్నిస్తూ
నిన్ను కీర్తించడానికి
పదాల కోసం వెతుక్కుంటూ…
ఎంత అల్ప ప్రయత్నం చేస్తూ వున్నాను
అనంతమైన సౌందర్యాన్ని
అల్పమైన మాటలతో వ్యక్తం చేయాలని
వ్యర్థ ప్రయత్నం చేస్తూ…

***

నా హృదయం ఎక్కడ పోయిందని
ఎన్నో రోజులుగా వెతుకుతున్నాను
ఇప్పుడు తెలిసింది
నీవే నా హృదయమని.

***

నా హృదయం
నీచే దొంగిలింపబడాలని కోరుకుంటాను
నీ హృదయాన్ని
నేను గెలవాలని కోరుకుంటాను.

***

నిన్ను చూస్తున్నంత సేపూ
సుమధుర సంగీతం
వింటున్నట్లుగా
గాలి మేఘాలపై
విహరిస్తున్నట్లుగా
నిన్ను చూడనంతసేపూ
చీకటిలో, చిట్టడవిలో
దారికోసం తడుముకుంటున్నట్లూ
వుంటుందేందుకనో!

***

నా కళ్ళు ఏమని భాషిస్తున్నాయో
నీకే తెలుసు?
నీ కళ్ళనడుగు.
నా హృదయం నీకెంత సన్నిహితమో
నీకేం తెలుసు?
నీ హృదయాన్నడుగు.

***

నీ చూపుల గాలులతో
నా హృదయ సంద్రంలో
తుఫాను రేపకు,
నన్ను గాయ పర్చకు.

***

ఈ చీకటితో నెయ్యం
నే చేయలేను చెలీ!
నీవు మోసుకొచ్చే
అమృతభాండము కొరకు
ఎన్ని చీకటి రాత్రులు
ఎదురుచూస్తూ గడపను?

***
–ప్రసాద్

To Make a Difference (MAD) ఏం చేస్తోంది?

తేది:January 16, 2007 వర్గం:సేవ రచన:charasala 1,927 views

గత సంవత్సరంలో తెలుగు బ్లాగుల పరిచయం ఓ వరమయితే, MAD పరిచయం, అందులో పాల్పంచుకునే భాగ్యం కలగడం మరో వరం.
అది మన వల్ల కాదు అనో, అది చేయాల్సింది మనం కాదు అనో, వ్యవస్థే అలా వుందనో నిట్టూరుస్తూ కూర్చోవడమో చేయకుండా, “నేనూ ఓ సమిధనవుతాను..” అంటూ ప్రతి ఒక్కరూ చేయివేస్తే అది తప్పకుండా Make a Differece.
కొత్త సంవత్సరం ఏ పార్టీ ఎలా చేయాలి? ఎవరెవరిని పిలవాలి? ఏఏ వంటలు తినాలి? ఏ సినిమాకు వెళ్ళాలి అనే ప్రశ్నలు వేసుకోకుండా MAD సభ్యులు చలికి రోడ్లపక్కన కప్పుకోవడానికి కూడాలేకుండా వున్న నిరుపేదలకు ఏమి చేయగలం అని ఆలోచించారు. కొత్త సంవత్సరపు తొలిరోజుని పొద్దు పొడవక ముందే దుప్పట్ల పంపిణీతో ప్రారంబించారు.

కొన్ని దుప్పట్ల పంపిణీ ఫోటోలు

అసలైన హీరో
అసలైన హీరో
అసలైన హీరో
అసలైన హీరో
మరిన్ని ఫోటోలు ఇక్కడ చూడవచ్చు.

మొదటి విడతలో వచ్చిన అనూహ్య స్పందనకు, బాధితుల అగచాట్లకు స్పందించి మరో విడత పంపిణీకి సిద్దమవుతున్నారు.
కడపలో ఒక సామాన్యుడి మూడునెలల బాబుకి అసామాన్యమైన జబ్బు వచ్చిందని ఈనాడు ద్వారా తెలుసుకొని, ఆ ఇంటిలో బాదను తనింటిలో బాదగా చూసుకొని మీకు మేమున్నాం అంటూ ముందుకురికారు. బాబు తల్లిదండ్రులను బెంగళూరులో రిసీవ్ చేసుకొనే దగ్గర నుండీ, హాస్పిటల్ మేనేజ్‌మెంట్ తో మాట్ళాడే వరకూ, బాబు తల్లిదండ్రులకు వసతి కల్పించే దగ్గరినుండీ, వివిధ స్వచ్చంద సంస్థలతో మాట్లాడి కావలిసిన ఆర్థిక వనరులు సమకూర్చడం దగ్గర వరకూ ఒక్కొక్క సభ్యుడూ/సభ్యురాలు అవిరామర కృషి చేశారు.
ప్రస్తుతం ఆ మూడునెలల బాబు శస్త్ర చికిత్స అనంతరం ICUలో కోలుకుంటున్నాడు. 

సామాన్యుల ఇళ్ళల్లో MAD పూయిస్తున్న ఈ పూలు మరింతమందికి ఉత్ప్రేరకము అవ్వాలని, MADకు మరింత మందిని ఆదుకొనే శక్తి కలగాలని కోరుకుంటూ..

(మీకూ ఆసక్తిగా వుందా? అయితే ఆలస్యమెందుకు? MADలో చేరండి.)

Subscribe to tomakeadifference

–ప్రసాద్